गजल- यसपाली त मेरो गुलाफ... (प्रेम दिवस विशेष)

यसपालीत मेरो गुलाफ पक्कै लिन्छ होला ।।
हातमा छ रातो गुलाफ कस्लाइ दिन्छ होला ।।

धड्कन बन्द झैं हुन्छ उस्को सामु पुग्दा
यति धेरै किन मन आँतिन्छ होला ।।

सोचिराछु जम्मै कुरा पोखी पत्र लेखुँ
अनि पो मलाई उस्ले बल्ल चिन्छ होला ।।

देखेकै दिन देखी मन पराउन थालेँ
जे जे पर्ला अव प्रस्ताव राखिन्छ होला ।।

मेरो मायाँ चोखो छ स्विकार हुन्छ हुन्न
उस्लाई पनि मायाँ गर्ने चाहिन्छ होला ।।

सबै भन्दा मिल्ने साथी भैसकेको छु म
उसै सँग सुख दुख बाँडिन्छ होला ।।

छिनो फानो पक्कै हुन्छ प्रेम दिवसमा
हैरान छु म पाईन्छ कि गुमाईन्छ होला ।।
राम शरण श्रेष्ठ
चिसापानी ६, रामेछाप ।