यज्ञ प्रसाद गिरीका ५ गजलहरू-08-07-2015

यज्ञ प्रसाद गिरी

1. गजल
नैतिकता नभा'का, विजेता भए ; 
अपराधिका पक्षधर, नेता भए । 
(१)
हुनै सकेनन, संरक्षक कसैका; 
मात्र यि देशका, बिक्रेता भए ।
(२)
काला कर्तुतका, सुत्रधार यिनै ;
रंग -रोगन दलेर, सेता भए ।
(३)
हिजो फुटपाथमा, खुराफात गर्थै;
आज चिल्लो कारका, क्रेता भए।
(४)
सोहरी रहेछन, पसिना जनताको;
रातारात विकाशे, अभिनेता भए ।
यज्ञ प्रसाद गिरी
आनन्दबस्ती, ललितपुर
२०७१ साल भाद्र, २ गते

2. गजल 
छुट्टिएर तिमीसंग, बाँच्नै गाह्रो भा'छ ;
सुस्त-सुस्त दुखाईको, मात प्यारो भा'छ ;
(१)
भनुँ भने के भनुँ खै, के नै भन्नु छ र ?
आज तिम्रो उपेक्षाले, मन अध्याँरो भा'छ ।
(२)
फूल जस्तो रुप थियो, नौनी जस्तो मन ;
ढुग्ङा जस्तो किन होला, सारै साह्रो भा'छ ।
(३)
हराएछु जिन्दगीको , सुनामीमा परी;
हिजो भन्दा आज खुसी, झन् उधारो भा'छ ।
(४)
कहाँ लगी घोप्ट्याउनु, ब्यथित मन मेरो ;
गजल मेरो मन पोख्ने, ढुग्ङे धारो भा'छ ।
यज्ञ प्रसाद गिरी
आनन्दबस्ती, ललितपुर
२०७१ साल श्रावण, २७ गते

3. गजल 
हिजो-आज सम्झी बस्नु, मेरो बानी भएको छ ;
तिम्रो याद माछालाई , अमृत्पानी भएको छ ।
(१)
जिन्दगी यो लक्ष बिना, यात्रा गरे सरी भयो ;
तिम्रो माया यी आखाँका, दुई नानी भएको छ ।
(२)
हुरी जस्तै बनी पस्यौ, जिन्दगीमा तिमी मेरो ;
निस्किएर फुत्त भाग्नु, बेईमानी भएको छ ;
(३)
गर्व गर्दै हिड्ने गर्थैं , तिम्रो साथ पाए भन्दै ;
तर आज स्वाभिमान , पानी-पानी भएको छ ।
(४)
बहाना त धेरै होलान , आफ्नो गल्ति लुकाउने;
जे-जे यहाँ भएको छ, जानी-जानी भएको छ ।
यज्ञ प्रसाद गिरी
आनन्दबस्ती, ललितपुर
२०७१ साल, भाद्र १८ गते

4. गजल
छैन अरुको जस्तो सतही, मेरो माया ;
कसी लगाई हेर त सही, मेरो माया ।
(१)
न स्वार्थमा अडेको न लोभमा बढेको;
प्रेम- दुधले जमेको हो दही, मेरो माया ।
(२)
युगौ-युग अमर रहन्छ, चन्द्र-सुर्य जस्तै;
आफै्नै राजिनामाको हो सही मेरो माया।
(३)
कुनै युगमा तोकिएको छैन मुल्य प्रेमको;
हुने सक्दैन कुनै खाता बही मेरो माया ।
(४)
सुम्पन्छु मेरो सर्वोत्तम सम्पति तिमिलाई;
बाँड्या छैन कहिल्यै अन्त कही मेरो माया।
यज्ञ प्रसाद गिरी
आनन्दबस्ती, ललितपुर
२०७१ साल भाद्र, २४ गते

5. गजल
तिम्रो याद सुसाएको, चैते हुरी सरी भयो;
तिम्रो माया आँखाबाट,आँसु बनी झरी रह्यो ।
(१)
हिड्दा-हिड्दै बाटोबाटै, तिम्लाई गुमाएको दिन;
भुस्को आगो बले सरी, भित्र-भित्रै बलि रह्यो।
(२)
भाग्य पनि किन यस्तो भा'को होला मेरो मात्र;
मिलनको सम्भावना, सधै-सधै टरि रह्यो ।
(३)
मलिन हुदै बिदाईको , तिम्ले हाल हल्लाउँदा ;
मुटु घोच्यो चस्स-चस्स, मनमा गाँठो परि रह्यो ।
(४)
कुन्नि कता तिमी गयौ मलाई छोडी टाढा-टाढा;
तिम्रो याद किलो बनी, ह्रदयमा गढी रह्यो।
यज्ञ प्रसाद गिरी
आनन्दबस्ती, ललितपुर
२०७१ साल, आश्विन १० गते